firstLine"; ?>

144. A-nois aithnighim m’uabhar $
Length: long 38qq
Certainty: 5
Period:
  1. 15th mid
Areas:
  1. Ulster
Classes:
  1. elegy mp
Manuscripts:
  1. Rawl. B 514 Poems to O’Donnells 16 c.
Prints:
  1. text Ir. Texts ii, 82
Motifs:
  1. poet-patron relationship (toghuim)
  2. landscape withers on ruler’s death
  3. Death came at outset of triumphant career
  4. patron’s death brings end to feasting
  5. symptoms of grief
  6. people assemble on grave
  7. poet’s own mourning
  8. poet’s vigil on patron’s grave
  9. poet too haughty in time of prosperity?
Poet Christian Names:
  1. Gofraidh (Rawl B. 514)
Poet Surnames:
  1. Mac an Bhaird
Patron Christian Names:
  1. Seaan mac Domhnaill
Patron Surnames:
  1. O Domhnaill [d. 1435?]
Meter Vars:
  1. RannBheag
Poem:

Poem in printable PDF format

A-nois aithnighim m’uabhar


[Fraser, J. and O’Keeffe, J. G.: ’Poems on the O’Donnells (1200 to 1600)’, Irish Texts ii (ed. Fraser, J. et al., London, 1931), poem 18; from Rawlinson B 514]


The Death of a Patron.


Gofraidh Mac an Bhaird cct.


1 Anois aithnighim m’uabhar

airighim ar gach n-aeinfhear;

ler chuir sinn d’eol ar m’uabhar

fuaradh linn deor do dheineamh.


2 Cuimhne ar caei re clainn Dalaigh

do bhoing an dlaei dom dheraibh,

ruc se dar nderni a diamhair

mé ar fhianaibh Erni d’fheghain.


3 Anuim ar uaidh in churaidh

ni fhaghaim uaim gan anadh;

ar techt dom thigh ni thibhar

m’inadh ar fhert fhir Adhar.


4 A ghul oruind ni fhoirend

dul I Chonuill ge chaineam;

sidh mo dherc nocha denuim

co feghuim fert righ Railend.


5 Da hol ni fhaghaim croidhe

da n-anuind ag ol fhledha;

m’uain nocha linn da luighe

sinn na ghoire ar uaidh ele.


6 Cin Seaain ni hail d’iarraidh

d’eatrain aigh ara fheolfhuil;

do shen ma do chuir chanuigh

fremh Dhaluigh ar fhuil Eoghain.


7 Da fhine ni huair ola

ar mbuain a mbile dina;

fuath fledh ’con fhuilsi Enna

séla a thuirsi ar fer bfhina.


8 D’eis in righ o Raith Oiligh

in sidh do chach ni cabhair;

in fedh nach frith a dheimhin

ceilidh fer an fhich fhalaidh.


9 A bfhoghbhuind duind ni damhthair

tre mac Domhnuill Duin Chobhthaigh;

ara mhéd do ni ar neamhthoil

derbhthoir eg an ti thorchair.


10 Re a re doich re a fhilidh

a frith da eis da fhalaidh;

mo sheal roimhe is fer fuinidh

cuiridh fer oile am aghaidh.


11 Truaille mo dherc do dileadh.

ar n-uainne os fhert an fheinnedh;

ge do bhi an uaidh na haenar

nir haemhadh uaim i d’einfher.


12 Re mac Domhnaill adeirim:

I Dhomhnuill an tan toghuim

tu, ar tos ge tú thaghaind,

taghaim fos tar chru Chonuill.


13 Gloir chaigh do chuir a ndiamhair

da bfhuil gan dail dom dheraibh;

fer do chlecht me ’gud mhaidhimh

maidhidh se t’fhert ’gam fheghain.


14 Atu ag imthecht ’s ag anmhuin

gan imthecht is tu ar turbhaidh;

turnfaidh se a mair dar menmuin

me ag lenmhuin ar Maigh Mhurbhaigh.


15 Do bharr bhroin truaigh fhein Uladh

ar mo cheill dochuaidh teimheal;

fada me ar t’fhert ag anadh

’s techt falamh dhe fa dheireadh.


16 Dailidh mo dherc deor tuilledh

ar t’fhert a ndeogh a dhonnaidh;

sind ar t’uaigh le gach n-urraidh

lind gan chumhuigh uain t’ollaimh.


17 Trom cumha caigh im choinne.

’na ndail ni lugha linne;

ni chuir fledh an oigh uirre

le truime broin bfher bFhinde.


18 Nech o gleoágh fher n-Oiligh

tre tSheán ni threabh thulaigh;

gort gan bhein thall fa thoraidh

domhain clann Neill o nuraidh.


19 Doilghe duin é ar on Oilill,

a Dhe, gan an uir oraind;

fer m’aithne ann ni fhaghaim

d’aithle taghaill chlann Chonaill.


20 Teann as bar n-ucht dob anuail,

an lucht agarb fherr m’anair;

ni bhi oirn a n-uair chomhoil

d’onoir acht moirn uaibh d’fhaghail.


21 Ceim ar cul leisin cumhaidh

’con fhein o Dhun an droighin;

ar son a mbroin do berair

modh nach dleghair d’fhoir Oiligh.


22 D’eis laeich Fhemhin is imdha

a ngeimhil gan mhaeith mhemna;

is fiu caei ciall a labhra

da labhra an chaei im fhiadh Emhna.


23 Tuc ar fer obair ele

sreabh do thoghaibh a thighe;

tainic faei ar tocht don tuile

gort uidhe laei on line.


24 Nach leir, a thruaigh, a thurchor

leis in sal fein do folchadh;

loch ’s a tonna ’na thimchol

imchor cloch orra d’anfadh.


25 Tuc omhuin ar fer luinge

sreabh ’na coruibh ’na choindi;

fidh nach gar do Ghlinn Fhinde

in Fhind imme ag car choimme.


26 Locha ar Seaain-ne as samhlaidh

srotha ceoshaile cubhair,

gebe ti lamh re Lemhuin

benuidh di clar da cumhaidh.


27 Croinn thoraidh in fhuind iubhraigh

da mboing ni thabhair thurbhaidh;

fuair duine dil a n-adhnaidh

crin d’abhlaigh Mhuighe Muirbhaigh.


28 Beg sin do dhith an deighfhir,

crich ni fhuil aga oighir:

in ri fein ó nach bfhaghair

gan ni is cabhair d’fhein Oiligh.


29 Do bhi d’annsa fhir Achla

dom thigh damsa nár dhulta;

gebe ti d’uaigh I Erca

bar leptha suain hí, a Ulta.


30 Aighe do fholmhaigh raena

gu comhrag Craibhe Tuama,

gar a thech d’uaidh I Enna

nech dobhera in uaimh uadha.


30 Aighe do fholmhaigh raena

gu comhrag Craibhe Tuama,

gar a thech d’uaidh I Enna

nech dobhera in uaimh uadha.


31 In tsuil fein tre fer nIle

do fher deir nach da ndeoine;

ba chaidh cosg caigh da cheli

gach rosg feni ag dail deoire.


32 Ni dhechaidh me is ni mhairim

d’esbhaidh an te do thoghaind;

medh in righ and ni fhuighind;

sguirim do rimh chlann Conaill.


33 Ni ragha i n-uaidh da aire,

a h-uain ga fagha file?

ge tenn is e re ’roile,

me ag loighi a cenn an chr[o]idhe.


34 Eigen orruim d’fhuil Eoghain

fail Chonuill o nach caomhain;

buain a righ do fhreimh Dhaluigh

tarraidh sil Neill da naomhaibh.


35 Ni fhuair a chridhe ar cula

file don uaidh dan fhaomha;

is nessa doibh a ndera

sgela tsloigh Esa Aodha.


36 Righe ar cach do budh chosmhail

’gar righ-ne a trath a thuisimh;

gin co dibh fen in fer sin

is esbhaidh righ d’fhein Uisnigh.


37 Tre gleoagh na bhfer bhfaghla

Seaan do mher mo mhenma

muna lenta ar fhuil m’abhra

falmha ar nderca im thuir Temra.


38 Prap ar comhroind a chana

tre mac nDomhnaill ar ndera,

moidi ar mbron tre tuir Tuama,

glor a Cuala d’fhuil Enna. Anois.