firstLine"; ?>

289. Beag mhaireas do mhacraidh Gaoidheal $
Length: long 41qq
Certainty: 1
Period:
  1. 17th early
Areas:
  1. Ulster
Classes:
  1. eulogy mp
Manuscripts:
  1. RIA90 (24/P/12) O Clerigh school 17th c
  2. RIA2 (23/F/16) O’Gara MS 1655-9
  3. Sir Con O’Neill’s MS (Eigse xiii) c. 1681
  4. RIA 1366 (23/O/57) 18th c.
  5. BL Egerton 111 F OScannail1818
Prints:
  1. text (part) in C. Ni Dhomhnaill, Duanair. p.
Motifs:
  1. Envoi to patron’s spouse
  2. Envoi to another patron
  3. comparison of patron with all others
  4. Foreign conquest of Ireland
  5. Hunting
  6. Board games, gambling
  7. music
  8. Lapse of Gaelic ways
Poet Christian Names:
  1. Eochaidh (RIA 90)
Poet Surnames:
  1. O hEoghusa
Patron Christian Names:
  1. Brian mac Aodha
Patron Surnames:
  1. MagMathghamhna (d. 1622)
Meter Vars:
  1. seadhna
Poem:

Poem in printable PDF format

Beag mhaireas do mhacraidh Ghaoidheal

[RIA 90 (24/P/12), 140]

An fer cetna (Ua hEodhusa .i. Eochaid[h]) cecinit

[Séadna, Dán Díreach]


1 Beg maires do macraidh Gaoideal

geall re bas a mbetha gnath

gach ní do-chiú ni fath faoilte

a-niú trath a ccaointe ag cách.

2 Tuirthe cothaighte clann Milidh

ge mhairid ni mairenn síad

tred doba saoire re a soigidh

daoine ar n-ég gan oididh íad.

3 Ní fhoil ar ttecht don toinn baite

braon i ccuislinn ag cath Greg

do cheo an d(h)omhnain dail an cuire

goblain do-chaid[h] uile d’eg.

4 As cuid do chlesradh an betha

gach bang ar ccul do chuir dibh

’s mar do badar-san uair oile

oggasraidh shluaigh Toighe an Trir.

5 A-taid ar ttarraing a ccroideadh

fa ceas tursi truagh an béd

nach [leg. nochan?] bhfuil anam i n-aoinfher

da marann d’fuil Gaoideal Greg.

6 Tuccsat uallcha ar inntinn ccuthail

’s cétfadh ar muich malairt clé

aigneadh tim an degsloigh dillidh

senmoir linn ar-íribh é.

7 Scotha saorclann sluaigead[h] Temhra

terma a cconaigh do caith síad

do leg (an) tnuth a uille ortha

gur much tuile orcra íad.

8 Do dermaid síad a sen gnatach

a ngrain catha a cleasa luidh

a bhfraoch a ccoinbliocht a ccosnamh

oirbeart na laoch mbosghlan mb[úidh].

9 Do dearmaid siad siubhal lethbruach [141]

luighe i n-armaibh iondradh fonn

nochtadh meirgeth sidhghlan (?) sensnaith

diorgadh deirgsledh ccennaith ccorr.

10 Ni fhaicter gille ag geall tresa

na trealam laoic laim re cui[l]t

na colg ag deol dernann laimhe

ni ceanglann reodh fainne fuilt.

11 Ni faicter sdarga ar sduaigh droma

na dorncla ar taobh le techt

na cnes taislim i ttruaill eidigh

dob aisling uair éigin é.

12 Cuis athtursi a n-imbeart cotrom

crú i ndeabtaibh ni doirtid súd

rinn airm ni fhuiligh ar einfer

don buidhin mairbh feindeadh úd.

13 Ni ben graifne na geim buabhuill

ni benann cluithe clann riogh

triall fedhma na sealg gá[n] (?) suidhe

bedhg i menma duine diobh.

14 A n-aines meanma a mian reabraidh

a run toirbeart do treig síad

a soigidh gleo a n-aoidhe ar faghlaibh

ní daoine beó amlaidh íad.

15 Acht a-mhain co mairenn drithle

gan dol acht [leg. as] da n-íarsma s(i)úd

togbus ces do glainfreimh Ghaoideal

tes saighnein san aoibil úd.

16 ’Na gris a ccoguil clann Mhilidh

Mag Mathgamhna mairidh sé

d’eis na saorclann d’écc re hat[h]aidh

cred acht aoncrann achaidh é.

17 Gabla congbala craoi Banbha

Brian a-mhain a mairenn dibh

truagh leam gan lethghuaillidh oile

ceann creacsluaigidh toighi an [Trír].

18 Nir treig mar mhaithe muir Fheilim

a ol bend a brondadh séd

a marann as coir a caoinedh

acht anam slóigh Gaoideal nGrég.

19 Teid a n-ísle ar airde toirbeart

téd a mbuaidhreadh ar barr aoibh

téid a crúaidh ar cetfaidh meisnigh

decht[?]uir an tsluaigh cneisghil [chaoimh].

20 Nír isligh meanma mic Aodha [142]

gan inntinn mbeó gi be raibh

rinn gach gnasa an tann fa ttérna

bang fhasa gach enla air.

21 A n-am ega d’eineach Banbha

bía[idh a] (?) teist a ttus a ré

an maith gan anam re haimsir

flaith Manann ni faillsigh e.

22 Ni he a leiges re linn deacra

dith meisnigh na menma tlaith

ni gabhann binngribh bruigh Lighen

tnuidh re himsniomh crideadh cáich.

23 Gach ni do-geibh do gras fortúin

a aigneadh ni ardaig[h] síad

ní turn doilges a méid menma

coimdhes le geig nEmhna íad.

24 Do nos Cata consal romha[i]n[n]

et easbaidh iomcraidh sé

gan snaidhm a n-easgur tar eirghe

measdur le baidhbh nEirne é.

25 Ni fes ar righ freimhe Colla

a cuis orcra an uair as mó

scath gach roimeadra an tann toirnes

barr soimenma as doilges dó.

26 Ní bí ar a chur cuimhne diombaidh

gan duil n-ainis madh edh raib

mor leighius ’ga lecain tibrigh

ceilius deacair imnidh air.

27 Tegusc Ouid d’fior na tursi

a-ta a gcongnamh ’ga cnes mín

taigheradh cerd et clesradh

roideghad lerg slesghlan sidh.

28 Fulang saothair sechna uaignis

amarc fithchell fuaradh pill

tregad bragh sedasnach sidhe

bregaslac ban mbithe mbinn.

29 Leighius tuirsi do triath Cechna

comradh fileadh foilces iuil

diograis rann suadhanrath slighteach

fuaranghuth crann ccritreach cciúil.

30 Reatha miolchon monghor curadh [143]

coimling eachra amharc cuain

gairthe slogh re siothur ndumcha

lor do diochur urcra uaidh.

31 Re linn claochluidh cloinne Milidh

mac Onora erla fand

nir fhill on gnath do glac reimhe

dar lat as trath eile ann.

32 Dia da choimhde do-ciú aen[fhe]ar

ua Aodha nach iongaibh gleo

fada scis aigenta uaidhe

gris caigealta as buaine breo.

33 Aon d’fine d’iarsma na nGaoidhel

gnuis aobhdha nach adrann cairt

gris tegtha teallaigh an oinigh

fethla ceangail oirir Airt.

34 Enchnu mogail mhaicne Colla

coimeadaidh Emhna an feoir chuirr

buain a cceotursi di cridibh

beochuisle sluaigh cinidh Cuinn.

35 Lam dioscaoilte duille an betha

Brian mac Aodha ionradh cen

gnuis nar gruadhcogain gleo aoirrenn

smualchogain (?) beo braoineng Breagh.

36 Rí o nUidhir m’adhbhar maoithe

da maireadh do mairfedh sé

gan bheth beo maraidh an milidh

samhail ceo ar-iribh é. Becc....

37 D’ingin Aodha ni hainm breige

barr gach enmna as oirches dí

gnuis tennaldha gan tal n-umal (?)

b[e]annama ban nUladh í.

38 Fiú Mairi da mesta a hoineach

dob [fh]iú a cele a cor ’na diaidh

fiu a huaisle faghbail an anma

fuair-si o daghmain Ba[nbha] Briain.

39 Braon d’fuil Colla na ccolg ngreanta

geg d’Ibh Conuill cosnus gliaidh

firsreabh don fhuil-si Neill naraigh

cuisle do freimh badhaigh Briain.

40 Rosg cuisneach ar cruth an oigridh [144]

aghaidh loinnerdha ar li an duinn

blath na ríoghcrann co ríar ttairtheach

da ngiall siolclann caithmeach Cu[inn].