firstLine"; ?>

458. Cia rer fuirghedh feis Teamhra $
Length: very long 57qq
Certainty: 1
Period:
  1. 15th ult
Areas:
  1. Ulster
Classes:
  1. eulogy mp
Manuscripts:
  1. Bodl. Rawl. B514 Betha CC & poems
  2. NLI G167 Semus MagUidhir 1727
Prints:
  1. text Ir. Texts ii, 96
Motifs:
  1. envoi to wife
  2. nobility of ancestry
  3. caithreim
  4. Inauguration [‘coroin’] q. 19
  5. territory as king’s spouse
  6. fertility of land under true king
  7. submission, umhla
  8. prophecies of ruler
  9. High kingship of Ireland
  10. legal terminology (eruic)
Poet Christian Names:
  1. Seaan (Rawl. B. 514)
Poet Surnames:
  1. O Dalaigh (.i. O Dalaigh Breifne)
Patron Christian Names:
  1. Aodh mac Neill
Patron Surnames:
  1. O Domhnaill d. 1505
Apologue Subclasses:
  1. Battle of Magh Leana
Meter Vars:
  1. deibhidhe
Poem:

Poem in printable PDF format

Cia rér fuirgheadh feis Teamhra?


[Fraser, J. and O’Keeffe, J. G.: ‘Poems on the O’Donnells (1200 to 1600)’, Irish Texts ii (ed. Fraser, J. et al., London, 1931), poem 21; from Rawlinson B 514]


Ó Dálaigh Breithfne .i. Seaán cecinit

1 Cia rer fuirghedh feis Teamhra

ar claochlogh a cedmheadhra?

mithidh ri a tulaigh an Trir,

nír chubhaidh hi gan airdrigh.


2 In bhfuil cabhair ina cend?

fada aontoma Eirend.

fiafruigh do Thoigh na Tri bhFear

ga rí re foil ag feicheamh.


3 Inis Fail na fidh toruidh

cuich an flaith, an fedabhair,

d’uaislibh Gaoidhel da tuc thoil?

ga haoinfhear ruc do roghain?


4 Cia an ri do righraidh bhfear Fail

budh fearr le hEirind d’fhaghail,

da tuctha a rogha dibh di,

a togha righ don righe?


5 In forlann a fuil Teamhair

nach urusa d’oileamhain,

do bhraithfinn, gidh be len holc,

an te aithnim da hurtacht.


6 Leghthor a leabhraibh ar sen,

tuicthear a fis ar faidhedh

do dhaingnigh Dia in faidh fire

cia danab ail in airdrighe.


7 Aodh O Domhnaill dhingnius cath,

ris do fuirghedh feiss Temrach;

ar mbuain celle do chabhair

Eiri uaidh le henroghain.


8 Feiss i nach inchurtha a bhfad,

celi nach coir do dhermhad,

rogha tshlóigh ghegmhara Ghreg,

cedragha is coir do choimed.


9 Bidh ar cuimhne ag ceibh na ngleann

ar ghabh oirechus Eireann,

da braithlis co Niall anond

ni bhiam d’aithris a n-anmond.


10 Os a ceann do chuala me

deich righ da rainig Eri,

lubhghort gecc a caomhbhrogh Chuinn,

in t-aonmodh deg O Domhnuill.


11 Ar teccuscc da thrilis loig

dual comhairle do charoid

cuimhnigh t’fhine d’uaim Banbha,

dlighe uaim dot athardha


12 Cuig tighearna ata os a ceann,

cuig ronna ar inis Eireann;

Inis Fail a ri adrulla,

nair is gan hi ag enurra.


13 Cuig righ uaisle Innsi Fail

ataid re toirchill d’enlaimh,

gan righ dibh ag righe ribh

is dibh dlighe do dhuthaigh.


14 Ri Uladh na n-iath solus

ni hinchuirthe a n-amharus;

dobhera se a lamh ad laimh

gidh be len b’ál gan t’anair.


15 A thoirmesc ni budh thualaing,

fasuigh menma, a mhorluaghuill;

tiucfaid Laighin a leith ribh,

beith at aighidh ni heidir.


16 Righradh Mhumhan mic Dhaire

do chomhall a cedbhaidhe

esgaidh ri Mumhan amuigh,

do bhi umhal gan iarraidh.


17 Ri Connacht an chuain ealtaigh

chugad leis na cedtechtaibh,

a chain, mar adera, duid,

ad laimh dobhera a bhraghuid.


18 Fuaruis a n-umhla, a fholt tiugh;

ni fhuil ag uaislibh Gaoidhel

acht Ri Teamhra ribh do radh,

a menma sin ar sithlagh.


19 Tu an ri re roibhe a h-aire,

tu a blath do bhi a tarrngaire.

Cuin gheabha in choroin fad cheann

gur mheala onoir Eireann?


20 Ni bhia ad diaigh, a dhreach nar,

ni rabh ag ri riamh romhad

mur ta Gort Logha red lind

a fhola ort ag Eirind.


21 Tairthe flatha ar a fedhaibh,

iasc airdrigh na h-indbhearaibh,

ar a druim is mine muir,

re righe Cuinn is casmhuil.


22 Gan tuinn do thadhall a tragh,

ar locha, ar n-aibhne, ar n-ealadh;

gur bhen grianbhuse righ rind

bidh a fhiadhnuse ar Eirind.


23 Mogenuir d’Eirinn fuair flaith

nach bhfuair ’s nach bhfuighe a chommaith;

Mur Da Thi - is mana Mumha -

ni bhi acht tagha tighearna.


24 Eist uaim, a errla sgathach,

tallann ar Cond Cedchathach,

an flaith is ibh a aithchin,

a mhaith sin ni saraighthir.


25 Mogh Nuadhat do chuir na chend

timcholl oirechuis Eirend

gairm da righ gurbh eiccen ann,

sidh nachar bh’eidir d’fhulang.


26 La cath, a Chomde nimhe,

gabthur aca d’airithe

a Magh Lena, a fhlaith Uladh,

sgeala is mhaith re a mheabhrughad.


27 An cath ni chuireabh a bhfad;

tar marbhadh Mogha Nuadhad,

do laimh Chuind do fhuair a oighidh,

uain an fhuind gan enoidhir.


28 Cond Cedchathach na ced trod

d’eis marbhtha Mogha Nuadhad

fa leis fein uile an t-Achadh,

a leim luighe ar lethnachadh,


29 Tu is enoidhri a n-inadh Chuind

againd, a Aedh I Dhomhnuill;

bera tu ar airdrigh Eireann

d’fhairbhrigh do chlu caithreimeand.


30 O Domhnaill, a dhreach cundla,

dot indarba as t’athardha

tainic bas an deidhfhir de

ar bhfas t’einigh is t’uaisle.


31 Goirid cor bhenuis da mbun

clann Nechtain d’eis a n-athar;

nir bh’ionond sen doibh is deit,

a len dochoidh a comghleic.


32 Toirrdhelbach Cairbrech, ceim aigh,

do thoillis gnaei ara ghabhail

narbh infhedhma e o shin

’s e ’na thighearna an traithsin.


33 D’eis na ngnimh sin druim ar druim

do ghabh tusa tir Conuill;

in choir dochuaidh ’na h-inadh

do choir uaibh ar aitiughadh.


34 Do ghabhuis, a ghruadh mar fhion,

Caislen Sligigh, sen airdriogh,

nachar gabhadh riamh romhuibh,

srian t’fhaghal gan aradhuin,


35 Caislen na Drobhaoise duit,

a Aedh na n-aithes comhruic,

ni coimhelta gleic red ghnaei,

doighenta deit a ndentaei.


36 Don luaighill chedna, a chruth tais,

Caislen na Finde fuaruis,

narbh fherr an sen fhuair th’athair,

do thren uaidh ar Ulltachaibh.


37 Leor let fein a bhfuil dod smacht,

a Aedh, ar ichtar Chonnacht,

toil Chairbrech an breth fa mbi

madh ainbreth an breth bertaei.


38 Cenel Eoghain do leim libh,

baire nach bia gan airimh;

thiar nachar dhecra do dhiol

do thriall dob echtra airdrigh.


39 Daingen nar thualaing techt ris

Lagan Uladh do airgis -

mairg nar umhal re t’aghaidh -

aird Uladh co riarabhair.


40 Ibh Echach ar techt astech

ad chaithreim, a chruth fhaeiltech,

tu fa ghnaei o thuind co tuind

ataei fa chlu o chumuim.


41 Nir fhagbhuis boin, a bharr tais,

a Aedh I Dhomhnaill Dhrulais,

o Chlochar co cuan Dheirge,

buan dochar do dhibhfheirge.


42 Tareis a mbo do bhreith lat

a comhtha ga cur chugad,

tabhach o shin nir tsiris,

fir Mhanach do mhinighis.


43 Breifthne I Ruairc, a ri Bernais,

o laochraidh do fhlaithiumhnais

Daingen Chonnacht, mas si soin,

atchondarc hi gan enbhoin.


44 Do bhris tu Cloch a Craebh Mhis,

do loiscis hi, do airgis;

adhmhaire ina gach echtra

sa nAnghaile t’ imthechta.


45 Tu ag imthecht iarthoir Mhidhe

’ga h-aisdri dob airmhidhe

eider iathmhuighe is fhoithribh

a n-iarrfuighe ardoighthir.


46 Caislen Dealbhna fadoigher

gerbh imchian a innsoidhedh,

Delbhna do thimchill tusa,

inchind fhedna in echtrasa.


47 Do ghabh tu cud t’athar ris,

Cairbre Laighen, ’s do loiscis,

gnimh asa techta thoruibh,

echtra righ do ronabhair.


48 Leomhan sud ar cruas croidhe

is nathair ar neimhnighe;

t’fhedhuin ar moille na mnaib

tre fedhuibh Cloinne Colmain.


49 Ni he so amhain, da maire,

bar sealga fan Sradbhaile,

dorinde tu dethaigh de

do bhethaigh do chlu choidhche.


50 Congall ni bu leor libh

a n-eruic h’athar d’oighidh,

a fuair Lugh a cumhuil Chein

cubhuidh a chur ad chaithreim.


51 Gach aithes dar imthigh ort

ag imthech uachtair Chonnacht

terc tuaruim don tuile cen,

ni tualuing uile in airemh.


52 Da sirinn o mhuir co muir

cuic cuicidh Chriche Findtuin

ni bhi gan t’eclusa air

acht eclusa no ollaimh.


53 Crich ar do chaithreim do chur

ni fhuil acht airemh reltan,

co ndernar duille na fedh

gan t’engnamh uile d’airemh.


54 Ni fhuil coscur nar chuiris

na cuigedh nar chennsuighis;

tu fa chlu feli is fedhma;

Eri, budh tu a tigherna.


55 A mhic fhindghualnigh Fhoid Bhregh,

a mhic Neill Tulcha Taillten,

coir sgath re sgelaibh t’aicme,

gebaidh cach do chomairci. C. I. A. rer fuirghedh feis Teamhrach.


56 Inghean I Bhriain bhrondus or

feis nach tualaing do chlaechlodh,

do fhed a maith a mholadh

med a caith in cualabhar ?


57 Ni fuighthear, ni frith a geall,

a maithes os mnaibh Eireann,

fer cumaind gach duine di,

a n-urruim uile aici. C. I.A.