firstLine"; ?>

968. Fuair Domhnall oighreacht an einigh $
Length: long 34qq
Certainty: 1
Period:
  1. 16th ult
  2. 17th early
Areas:
  1. Ulster
Classes:
  1. eulogy mp
Manuscripts:
  1. RIA 475 (24/P/25) L. Cl. Suibhne 16th-17
  2. Stoneyhurst A/II/20ii C. O Corbain 1701
Motifs:
  1. imagery for patron (ceinnbhile cnuais)
  2. weapons (tuagh, sleagh, feilm)
  3. nobility of ancestry
  4. lesser arts: cáinte
  5. liberality to poets
  6. prowess in war
  7. harrying
  8. mercenaries, buanna
  9. king’s officer: maor
  10. allusion to Ruaraiocht? (fury cooled in tub)
Poet Christian Names:
  1. Donnchadh (RIA 475, Stoneyhurst)
Poet Surnames:
  1. O Cleirigh
Patron Christian Names:
  1. Domhnall mac Toirdhealbhaigh mhc Ruaidhri
Patron Surnames:
  1. MacSuibhne Fanad (fl. 1570-d. 1619)
Meter Vars:
  1. seadhna
Poem:

Poem in printable PDF format

Fuair Domhnall oighreacht an einigh

[RIA 475 (24/p/25) Leabhar Chlainne Suibhne, 76r, p. 145]

Dondcad O Cleirigh cecinit

[Séadna, Dán Díreach]


1 [F]uair Domnall oighreacht an enigh

iomdha ce[i]m ’nar chosain se

do braith cliar ar truimme a thoirbeart

uirre riam don oigrecht é.

2 On fhior lenus lorg a chinid[h]

clár Fodla fuair a toils

ni theid an clú a ce[i]m da dhuilghi

nac le[i]r do cru Suibni soin.

3 Tapart (?) a cúil da ceird duthcu[i]s

tre dail maoinedh mor a doigh

do-chuaidh clann ollaim tar fhoghlaim

o barr brondaid[h] Domnaill doib.

4 Ua Ruaidri go dol a ndeabaid[h]

ni dernad[h] leis lon da gháibh

gnath ana re cois an caithme

fagha ’na bois d’aithle [áigh?].

5 Decair traothad[h] da thuinn muincinn (?)

Mac Suibne gur thanaig thoir

fedhm ar shamthaig[h] ’na bais bairrgil

le mblag[h]thair frais d’f[h]ailgib[h] oir.

6 Fedm os niort do-ní da fechain

fedhain loech nac loc le geis

a cur chairthi o ghlun go gualainn

úr na faithchi ar luagaill leis.

7 Go tabach (?) ceirt cloinne Dalaig

decair a troid cur re a chládh

ni fuil ara thuaigh do truime

nac fuil do buaidh uirre a n-agh.

8 Sgel as minca le mac Suibni

slan on troid nac tic ar ais

a coscc confaid[h] buana a mberna

blodhtair [leg. blogh-] tuagha lebra lais.

9 Ar tshluag[h] Fanad fuair mur choemna

do-chuaid[h] dib an doigh nar mair

do luigh fedh aigh edir (?) f[h]oebraib[h].

fer don toir gan oenguin air.

10 Minic fhágbaid d’eis a mblodhtha [76v]

bruighne biodhbad[h] fair smoils

siol Suibhne ar gac toebh ’ga tomhus

toeb bruig[h]ne gur dorus doib.

11 An fad tiaghaid téd a haigned[h]

inghean righ nac roinnfed[h]

a ngrian troda re foir Emhna

foda do-chóidh menma mná.

12 Gach troid da gcuir coir a mhaoidim

mac Toirrdealbaig suil ti noin

ge beg don toir a foil futhaib[h]

ni róigh soin da nduthaig[h] doib.

13 Cennbhili cnúais cloinni Suibne

sinedh re a blad[h] beg nac ró

ticc do ghniom an búanna a mberna

guala riogh go nderna do.

14 Cerd gach buanna blodad[h] cliathcha

do chuid di ni dechaid[h] thort

an trath bus debed[h] d’fhuil Fhiachaig[h]

do chuir deredh d’f[h]iachaib[h] ort.

15 O t’f[h]oghlaib[h] minci a Meic Shuibne

do shín chugaib cách fad gairm

tucc tú airdiarraidh ar fhogail

cú airdfhiadaig[h] oraib[h] dh’ainm.

16 Se le cach ni cuirthi a n-ingnad[h]

ennac slan nac ticc od troid

do gonadh fer léd cle[i]th gcorcra

fa bre[i]th legh nir dolta dhuid.

17 A ua na righ do fhre[i]m Eogain

imdha tir a tucais mairg

cosmail do buille a truaill treassa

re fuaim buinne eassa aird.

18 Lion áigh let fhaicsin a Domnaill

dealb gac áoin do athraig[h] gné

do-clos a fuaim ar fedh troda

fer od túaigh ger fhoda he.

19 Iadaid imad d’uaislib[h] Fanad

foirend loech nac loc o ghliaidh

siobal rioghna a cend an chatha

fa diorma eng ndatha [ad dhiaidh?].

20 Dob fada traigh od tuinn fhergi

d’fhoir biodhbad[h] go tucuis troid

tú ’ga cur a serg le samthaig[h]

t’ferg ’s gan dul a nda[bchaib[h]?] do[id?].

21 Ruccuis o buannaibh buaidh comlainn

cain gac tire ag teacht ad port

rioth do mháoirsi ar cach on chliathaig[h]

daoirsi san ath d’fiachaib[h] ort.

22 Nir hanadh lat co lar cúirti

cach uaib-si nir an re a drud

sib a clódh chatha go comlaidh (?)

srol datha fa tonngail (?) tug.

23 Ticc ad timchil a thus fhedma

elbha loech fa a leicter gort

tú ag sínedh le tuaig a tegmáil

nir uair miled d’edrain ort.

24 Do ben diob gan dol da bhualad[h]

bró mhiled[h] nar mhaith a ndoigh

’s iad ag sgaoiled[h] o choir comlainn

toir re maoidim Domnaill doib.

25 Bid ’na timchiol a tig comhóil

ar clannaibh riogh go rucc barr

do-beir fled[h] ’na dhun do dháoinibh

fear ar chúl gach áoinfhir ann.

26 Nir gabadh le co lar tachair

tuagh beltana blodhus fe[i]lm

on fheidm do cuired[h] uadh uirre

tuagh gan fuigheal buille a mbe[i]rn.

27 An trath buailes fa broin miled[h]

minic is báoghlac[h] buain di

gris ar fedh comhlainn da chaoilshleig[h]

medh Domnaill re n-aoigid[h] hí.

28 Go buain a ceart do chlar [M]acha

do Mac Suibne is si bus cairt

cur laime fa thuaigh a tachar

bráighe asa fuair achad[h] Airt.

29 D’feraib Fanad na lann liomtha

laoich ’ga togha ar tresi a lamh

nir geab fa fion ara uille

acht fer bud diol uirre a n-agh.

30 Aigned[h] ban da briogh ar merbhall

Mac Suibne an trath ted san fe[i]dm

do-be[i]r mna gan f[h]oglaim uama

lá comlainn ar buanna a mbe[i]rn.

31 A fer comlainn o crich Danar

a dhol uaidh ni he do-clos

loech tar sal a leth a laime

ler nár breth a baire a-bhos.

32 Mac Toirrdealbaig uaitne an enig

annamh fer bud choir ’na chlo

a shleg[h] re comlann do chainti

Domnall fer a dailti dhó.

33 Ar fedh gliadh da ghlacaib[h] leabra

lorg a buailti benaidh snas

iadais a bais fan tuaigh tarrngig[h]

glais fa uaim ar aindribh as.

34 Nirb ingnad e a n-esbaidh maoinedh

mac Toirrdhelbaig le a tug úaidh

se 7 Fanaid a cló a chele

ranaig don ró fele fuair. F...